У Беларусі пабудавана ўжо 30 лядовых палацаў. Нядаўна прэзідэнт Лукашэнка даручыў збудаваць палац і для Начной хакейнай лігі. Газета "Прессбол" правяла ўласнае расследванне, ці акупаюцца лядовыя палацы, што змяшчаюць больш за 500 гледачоў у тых гарадах, дзе няма хакейных клубаў. Высветлілася, што на самаакупляльнасць выйшлі толькі палац на вуліцы Прытыцкага ў Менску і арэна ў Пінску. Адразу 7 арэнаў нясуць страты. Самая стратная - арэна ў Лунінцы, якая акупаецца толькі на 12%. У Горках акупляльнасць 15-20%, Івацэвічах 21%, Кобрыне 28%, Пружанах 36%, Баранавічах 42%. На гэтым фоне Лядовая арэна ў Оршы ідзе не так і кепска, але ў цэлым таксама нічога пазітыўнага. Акупаецца яна толькі на 66%.
У тэксце прыводзяцца немалаважныя дадзеныя адносна ўтрымання палацаў. Прыкладам, палац у Івацэвічах зарабіў за 10 месяцаў 2015 года 1,5 мільярды рублёў. А паколькі акупляльнасць у яго толькі 21%, значыць, выдаткі на ўтрыманне палаца складаюць болей за 7 мільярдаў рублёў (на дадзены момант паводле курсу Нацбанка РБ гэта 400 тысяч даляраў).
