Лепшым рэзідэнтам свабоднай эканамічнай зоны "Віцебск" па выніках працы ў 2015 годзе прызнаны пачатковец - замежнае прадпрыемства "Лінпак Пэкэджынг Іст" у Оршы. Пераможца быў названы на выніковай нарадзе ў адміністрацыі СЭЗ, перадае БЕЛТА. Традыцыйна свабодная эканамічная зона вызначае сваіх лідэраў па выніках мінулага года, сярод іх выбіраюцца пераможцы ў намінацыях. Лепшым рэзідэнтам у гэты раз прызнана ЗТАА "Лінпак Пэкэджынг Іст", лепшым інвестарам - замежнае унітарнае прадпрыемства "ВІК - здароўе жывёл", а лепшым экспарцёрам - ААТ "Аршанскі авіярамонтны завод".
Прадпрыемства "Лінпак Пэкэджинг Іст" (даччынае падраздзяленне ангельскай групы Linpac Group) зарэгістравана ў СЭЗ "Віцебск" у 2012 годзе. На працягу двух гадоў рэалізацыі праекта англійскія бізнэсоўцы інвеставалі ў вытворчасць больш за $ 10 млн. Сама вытворчасць запушчана ў 2014 годзе. На выкупленых плошчах Аршанскага завода прыбораў аўтаматычнага кантролю (ПАК) цяпер выпускаюць упакоўку для харчовых прадуктаў, зваротную тару і пластыкавыя кантэйнеры з успененага полістыролу.
У цяперашні час 39 прадпрыемстваў рэалізуюць свае інвестыцыйныя праекты ў якасці рэзідэнтаў СЭЗ "Віцебск" (28 - у абласным цэнтры). У 2015 годзе дадаўся адзін рэзідэнт у Оршы - завод "Легмаш". А 6 прадпрыемстваў страцілі гэты статус: скончылі рэалізацыю праекту, былі выключаныя па прычыне невыканання дагаворных абавязацельстваў, устаноўленых паказчыкаў ці проста зачыніліся (ААТ "КІМ").
