У колішняй вёсцы Ліпкі-Ярашэвічы, якая была ўключаная ў рысу горада Орша, плануецца збудаваць некалькі дамоў для афрыканцаў, самалійцаў па нацыянальнасці. Пакуль невядома, колькі чалавек прыедзе ў Оршу, аднак Ільнокамбінат запатрабаваў новых работнікаў. На камбінаце ўжо працуюць кітайцы, якія ходзяць харчавацца асобна ад беларусаў.
Мяркуецца, што новыя дамы па вуліцы Ярашэвіцкай не будуць шматпавярховымі, верагодна будаўніцтва абмяжуецца двума паверхамі. Наўрад ці афрыканцаў прыедзе вельмі многа, на вытворчасць пакуль не патрабуецца шмат кадраў. Нагадаем, у Оршу яшчэ ў савецкія часы прыехала нямала в'етнамцаў, многія з якіх дагэтуль жывуць у нашым горадзе.
Ярашэвічы — новы раён Оршы, які імкліва развіваецца. Раней orsha.eu паведамляў пра новы аўтобусны маршрут туды. На вуліцу Ярашэвіцкую адзін раз у дзень заходзяць маршруты №10, №6 і №4.
