Рэйд па крамах Беларусі працягваецца. Мы раней апісвалі скандал, які ўзнік у краме "Алмі" на вуліцы 60 год БССР у Оршы. Цяпер у нашым горадзе актывісты кампаніі "Хрюши против" адшукалі яшчэ адну краму, якая прадае пратэрмінаваны тавар. Ды што там прадае — няякаснай прадукцыі са скончаным тэрмінам прыдатнасці ў краме "Івасі" на праспекце Тэкстыльшчыкаў, 9, назбіралася на 4 кошыкі!
Але варта аддаць належнае персаналу — у адрозненне ад "Алмі" ніякіх пагрозаў у бок валанцёраў кампаніі, ніякіх незаконных забаронаў на відэаздымкі ў грамадскім месцы не было. Прадавачкі прызналі, што не даглядзелі за некаторымі прадуктамі, і таму яны пратэрмінаваныя заставаліся ляжаць на прылаўках. У прысутнасці валанцёраў і пад відэазапіс пратэрмінаваныя прадукты, што знаходзіліся ў вакуумных упакоўках, былі ўскрытыя, каб зноў не трапілі на таварныя шэрагі. Прадаўцы крамы "Івасі" паводзілі сябе абсалютна культурна, не выказваліся нецэнзурнай лаянкай і з павагай паставіліся да актывістаў.
