Орша і Смаленск знаходзяцца ўсяго ў 120 кіламетрах адзін ад аднаго, доўга жылі ў адной дзяржаве, у Вялікім княстве Літоўскім, але цяпер знаходзяцца ў розных, Орша ў Беларусі, а Смаленск даўно належыць Расеі. Жыхары абодвух гарадоў часам "наведваюцца" ў госці з візітам на закупы. Не заўсёды такія візіты падабаюцца мясцовым жыхарам, аршанцаў у свой час смаляне вінавацілі ў праблемах з прадуктамі ў Смаленску. Аршанцы ўзгадваюць яшчэ савецкія часы, калі з БССР і Оршы ў прыватнасці прадукты вывозіліся ў Ленінград і Маскву. Пры гэтым жыхары блізкага да беларусаў горада РСФСР Смаленску заставаліся таксама ў дэфіцыце. Нярэдка жыхары Смаленска накіроўваліся ў Оршу, каб набываць тут прадукты, скуплялі масла, малако, мяса. Гэта не падабалася ўжо аршанцам. Цяпер масавага "паломніцтва" адзін да аднаго не назіраецца, але і не сказаць, што паездак зусім няма.
Журналісты "МК - Смоленск" параўналі кошты ў супермаркетах адной і той жа гандлёвай сеткі, якая прадстаўлена як у Смаленску, так і ў Оршы. На момант публікацыі матэрыялу 1 беларускі рубель каштаваў 31,09 расейскага, для зручнасці журналісты акруглілі суадносіны да фармату "1 да 31". Кошты ў Оршы падпісалі чорным колерам, смаленскія кошты пазначылі жоўтым. Атрымалася, што мука, цукар, грэчневая крупа, цвёрды сыр каштуюць у Оршы даражэй, але большасць іншых прадуктаў у нашым горадзе больш танная ў параўнанні са Смаленскам.
