Мова вядзецца пра экс-галоўнага трэнера футбольнага клуба "Смаргонь", які летась сваімі карупцыйнымі дзеяннямі спрабаваў паўплываць на судзейства матчу сваёй "Смаргоні" з "Оршай". Тады і сапраўды былі прэтэнзіі трэнерскага штабу "Оршы" да арбітраў, а "Орша" прайграла матч 0:3. У асноўным з-за слабой гульні, але паўплывала і судзейства. Неўзабаве Рындзюк і кіраўнік дэпартаменту інспектавання і судзейства Беларускай федэрацыі футбола Андрэй Жукаў былі злоўленыя на злачынстве. Жукаў у выніку атрымаў 5 гадоў турэмнага зняволення, а Рындзюку пашанцавала - яму замест пазбаўлення волі далі 2 гады выпраўленчых работаў, 25% ягонага заробку гэты час будзе пералічвацца на карысць дзяржавы. Таксама Беларуская федэрацыя футбола адхіліла Рындзюка ад футбола на 2 гады.
Аднак, як паказала практыка, федэрацыя не збіралася сачыць за выкананнем уласнага рашэння. Рындзюк знайшоў у працу якраз у футболе, прычым працаваць будзе з дзецьмі ў менскай футбольнай школе "Арсенал". Шэраг футбольных спецыялістаў здзіўлены, што чалавек, які маніпуляваў прызначэннем суддзяў на матчы свайго клуба, даваў хабар, насуперак афіцыйнаму рашэнню федэрацыі застаецца працаваць у футболе.
