Старшыня Віцебскага абласнога выканаўчага камітэту Мікалай Шарснёў наведаў з візітам Аршанскі мясакансервавы камбінат. На сустрэчы прысутнічаў і кіраўнік Аршанскага райвыканкаму Аляксандр Пазняк і кіраўніцтва мясакамбіната. Падчас сустрэчы было адзначана, што аршанскае прадпрыемства ўнікальнае ў мясной галіне рэгіёна і яго неабходна развіваць надалей. Вялікія праблемы камбіната засталіся ў мінулым, было заяўлена на сустрэчы. Мікалай Шарснёў зазначыў, што АМКК працуе пераважна на патрэбы ўнутранага рынку, болей за 80 % прадукцыі ідзе менавіта на Беларусь.

Цяпер на камбінаце адкрыўся цэх дзіцячага харчавання, акрамя таго прадпрыемства плануе атрымаць сертыфікат "Халяль", каб у перспектыве рабіць прадукцыю для мусульманскіх краінаў.

Таксама работнікам мясакамбіната ўдалося задаць Мікалаю Шарснёву пытанне пра заработную плату. У дадзены момант каля 10 % зарплаты (а часам, паводле некаторай інфармацыі і да 20%) работнікі мясакамбіната атрымліваюць прадукцыяй. Гэта значыць, што яны могуць набыць за частку сваёй зарплаты прадукцыю завода. Але ёсць і праблема - набываць мясную прадукцыю паводле такіх умоў можна толькі ў краме адной сеткі, дзе прадукцыя каштуе даражэй, чым у некаторых іншых крамах. На гэта пытанне Мікалай Шарснёў адказаў, што, магчыма, мясакамбінат прадаставіць работнікам карткі на атрыманне зніжак.