У Оршы ад нядаўняга часу прайшла замена шэрагу аўтобусных прыпынкаў. Таксама паставілі велізарныя гаршчкі. А на саміх аўтобусных прыпынках змяніўся каркас, але таксама змянілася і пакрыццё. Замест ранейшых сценак са шкла, якое пасля візітаў вандалаў было разбіта на многіх прыпынках, у тым ліку нават на цэнтральных вуліцах, сталі ставіць лёгкія пластыкавыя сценачкі. Але, як паказала практыка, падобная замена прадказальна не стала надзейнай, дзе-нідзе ўжо сустракаюцца разбітыя і пашкоджаныя секцыі.
На прыпынку "Плошча Ільнокамбіната" зрабілі такі рамонт прыпынку, што не можа пакінуць у спакоі сотні людзей, якія штодня праходзяць міма альбо чакаюць транспарт на ім. Адзін з аршанцаў на прыпынку выказаўся: "Выглядае на тое, што прыпынак толькі што абстралялі". Гэта вельмі цяжка назваць рамонтам, верагодна, рабочых вельмі прыспешвалі перад якім-небудзь высокім візітам (ёсць версія, што перад прыездам кіраўніка Адміністрацыі прэзідэнта Наталлі Качанавай). Але нармальных матэрыялаў, каб зрабіць якасны рамонт прыпынка, начальства не прадаставіла. Ацэньвайце самі знешні выгляд прыпынка, паважаныя чытачы.
