На партале ukr.net зарэгістравана больш за 16 мільёнаў акаўнтаў электроннай пошты. Ён быў створаны ў 1998 годзе, і з 2000-га стаў першай бясплатнай поштай ва Ўкраіне.
З 2003 года на паштовым партале з'явілася і стужка навін. Яны збіраюцца штохвіліны і размяшчаюцца ў адпаведных тэматычных раздзелах: «Палітыка», «Эканоміка», «Падзеі», «Грамадства», «Тэхналогіі», «Навука», «Аўта», «Спорт», «Здароўе», «Шоў-бізнэс», «За мяжой», «Кур'ёзы», «Фотарэпартаж», «Відэа». Прычым на сервісе фармуецца 25 асобных рэгіянальных стужак. Яны асвятляюць навіны не толькі з мясцовых, але і з рэспубліканскіх крыніц, якія маюць дачыненне да канкрэтнага рэгіёна.
Украінскі паштовы партал трапіў у поле зроку Горацкай пракуратуры, якая перадала адпаведны запыт у мясцовы суд. 5 лютага суд Горацкага раёна Магілёўскай вобласці прызнаў рэсурс ukr.net «экстрэмісцкай інфармацыйнай прадукцыяй». Яго ўключылі ў Рэспубліканскі спіс экстрэмісцкіх матэрыялаў на сайце Міністэрства інфармацыі.
Паводле таго ж механізму – на патрабаванне пракуратуры і па рашэнні суда Горацкага раёна ад 29 студзеня – у гэты спіс быў уключаны ТіkTok-акаўнт «Могилёв \ Бобруйск \ новости»
