У Віцебску 26-га лютага адбылася масавая акцыя пратэсту супраць падатку на дармаедства. Беларусы, абураныя тым, што падатак спаганяецца з тысячаў людзей, многія з якіх папросту не могуць знайсці працу на Радзіме, выйшлі на вуліцы. Усяго акцыя ў абласным цэнтры сабрала, па некаторых ацэнках, звыш 2 тысячаў чалавек. Спачатку грамадзяне мітынгавалі на плошчы Перамогі, дзе ўлады паралельна адмыслова зладзілі "праводзіны зімы". Затым людзі перамясціліся на іншы бок плошчы, да вядомых "Трох штыкоў". А пасля шматлікіх выступаў народ рушыў па вуліцы Леніна да філармоніі, дзе адбылася заключная частка акцыі. Людзі актыўна выказвалі сваю незадаволенасць уладамі, абураліся несправядлівымі прэтэнзіямі да іх з боку падатковай інспекцыі. У Віцебск у гэты дзень з'ехалася і нямала аршанцаў і жыхароў Аршанскага раёну, як палітычных актывістаў, так і звычайных грамадзянаў - ад студэнтаў да пенсіянераў. Нехта дабіраўся ў Віцебск на цягніках і аўтобусах, нехта загадзя скаапераваўся і прыбыў на плошчу Перамогі на аўтамабілях. Прысутнічаў на акцыі і карэспандэнт orsha.eu.
Адзін з удзельнікаў пратэстнага шэсця прызнаўся, што ў свой час быў скарочаны на заводзе, і з той пары не можа адшукаць нармальную працу ў роднай Оршы. Яшчэ адзін аршанец некалькі разоў ездзіў на заробкі ў суседнюю Расею, аднак цяпер і здароўе не дазваляе, і з сям'ёй быць хочацца, а не праводзіць шмат месяцаў у чужой краіне. Прысутная на акцыі жанчына-аршанка сталага веку прызналася, што яе асабіста дэкрэт не закранае, але ён датычыцца яе сына, які ў 28 гадоў мае праблемы з працаўладкаваннем. "У Оршы і ў цэлым у Беларусі не тое што працы не знайсці, дык часцей скарачаюць, чым прымаюць на працу".
Наступная акцыя супраць Дэкрэта № 3 пройдзе ў Віцебску 25-га сакавіка на плошчы Перамогі, пачатак а 12:00.
