На аграсядзібу "Пуцяціна" ў вёсцы Стаўры Аршанскага раёну наведаліся невядомыя людзі. Пакуль Ігара Грышанава не было, незнаёмыя прабраліся ў дом, дзе часам праходзяць розныя прэзентацыі і іншыя імпрэзы. Візіт скончыўся тым, што ў доме было ўсё перакулена дагары нагамі, а таксама ўзламаны сейф. Пры гэтым міліцыя, якая яшчэ раніцай атрымала паведамленне пра крадзеж, здолела прыехаць у Стаўры толькі пасля 17-й вечару. Злодзеі паводзілі сябе, мякка кажучы, падазрона. З рэчаў не ўзята нічога, акрамя некалькіх лыжачак, затое з сейфа забраныя ўсе дакументы актывіста. Міліцыя і эксперты, якія прыбылі на месца здарэння, адзначылі, што ніякіх адбіткаў пальцаў пабочных асоб на сядзібе не выяўлена. Выклікае вялікія падазрэнні час, калі ўсё здарылася — за некалькі гадзін да крадзяжу на аграсядзібе вядомага на Аршаншчыне чалавека адбыўся ператрус на офісе Аршанскай кааліцыі дэмакратычных сілаў, у выніку якога былі вынятыя на экспертызу кампутары і прынтэры. Ніхто з грамадскіх актывістаў не сумняецца ў палітычнай скіраванасці таго ператрусу, імаверна, ён звязаны з маючым адбыцца ў Оршы 12-га сакавіка "Маршам недармаедаў".

Пасля смерці Алеся Шутава ў кастрычніку 2016 года Ігар Грышанаў пачаў каардынаваць працу кампаніі "Гавары праўду!" ў нашым рэгіёне. 12 гадоў актывіст быў старэйшынам роднай вёскі Стаўры, меў вялікую падтрымку сярод аднавяскоўцаў, але ўлады не прызнавалі яго і шмат часу Грышанаў правёў у судах па разнастайных адміністратыўных справах.

Пасля сыходу з пасады старэйшыны вёскі ў пачатку 2017 года Ігар Грышанаў не перастаў займацца актыўнай грамадскай дзейнасцю і па-ранейшаму дапамагае роднай вёсцы. Напрыклад, на мінулым тыдні дзякуючы таму, што Грышанаў у патрабаваннях дайшоў да дэпутата Палаты прадстаўнікоў Людмілы Дабрынінай, у Стаўрах нарэшце ўсталявалі знакі на галоўнай дарозе.