"Тэмп" з Барані ў свой час быў адным з наймацнейшых клубаў Беларусі. Пасля свайго з'яўлення ў чэмпіянаце БССР у 1968 годзе каманда метадычна будавалася, спрабавала тактычныя схемы, а геній трэнера Гурчанкова дазваляў дабівацца патрэбных рэзультатаў. Нарэшце, у 1978 годзе калектыў з Барані выйграў бронзавыя медалі чэмпіянату. На папярэднім этапе першынства "Тэмп" выйграў 9 матчаў, 8 звёў унічыю і 3 прайграў. На 1 бал быў апярэджаны віцебскі "Тэхнолаг", і нашы землякі прабіліся ў фінальны этап турніру.
А ў вырашальным этапе былі 8 каманд. Аршанскі "Старт" прабіцца туды не здолеў, а вось "Тэмп" разгарнуўся напоўніцу. 5 перамог, 7 нічыіх, 2 паразы ў 14 матчах фінальнай "кулі" і "Тэмп" становіцца бронзавым прызёрам чэмпіянату БССР!
У газетным матэрыяле, які на сваіх старонках прыводзіць блог аршанскіх фанатаў orshafans2.livejournal.com, пералічваюцца прозвішчы гульцоў "Тэмпа" таго сезону: Барэйша, Шынкевіч, Занько, Дробышаў, Цветнікаў, Ганчароў, С.Ліпін, Верасовіч, Жаўно, Данілкоў, В.Ліпін, Ускоў, Каданаў, Філіпаў, Курыла, Марчанка, Круцько, Скараходаў. У чэмпіянаце лепшым бамбардзірам славутай каманды з Барані стаў Леанід Барэйша, які праз шмат гадоў, ужо ў 90-я трэніраваў аршанскі "Легмаш", ён забіў 13 галоў. Шынкевіч і Занько вызначыліся па 9 разоў.
