Пра тое, што два аршанскіх прадпрыемствы цяпер будуць далучаны да іншых паведаміў партал tut.by са спасылкай на міністэрства прамысловасці. Выглядае так, што падняць нашыя заводы самастойна так і не атрымаецца - больш за год распрацоўваліся праграмы па іх развіцці, больш за год абяццаліся сродкі і некаторыя, нават, былі выдзеленыя, але ў выніку прадпрыемствы страчваюць самастойнасць і перадаюцца больш багатым заводам.

Так, акцыі "Аршанскага інструментальнага заводу" цяпер будуць належыць Мінскаму трактарнаму заводу, а Завод прыбораў аўтаматычнага кантролю (ПАК) перадаецца жодзінскаму БелАЗу. Гэта звычайны метад для нашай краіны калі бедныя прадпрыемствы перадаюцца на ўтрыманне багатых. Так, адбываецца і ў Оршы. Раней такім чынам да жлобінскага металургічнага заводу быў аднесены аршанскі "Легмаш", а малочны камбінат у мінулым годзе быў перададзены брэсцкаму "Савушкін-прадукт". А пабудаваная нядаўна "Сладкая страна" адыйшла да "Віцьбы". Прыблізна тое ж адбываецца і на мясцовым узроўні - да "трымаўшыгася на плаву" камбіната хлебапрадуктаў (элеватар) былі далучаныя некаторыя праблематычныя прадпрыемствы, такім чынам атрымаўся "Оріс". Такі метад дапамагае стратным прадпрыемствам утрымацца ад банкрутства, але як паказвае досвед не дае штуршка для развіцця. Ды і самім "багатым" прадпрыемствам такі метад не прыносіць сур'ёзных дывідэнтаў. МТЗ плануе на базе інструментальнага арганізаваць цэнтар гарантыйнага ды сэрвіснага аблугоўвання на ўсю Віцебскую вобласць, а таксама склад запчастак. Завод жа павінен пачаць вырабляць новыя віды інструманта для металаапрацоўчых станкоў. ПАК жа павінен пачаць вырабляць некаторыя запчасткі для БелАЗу, для гэтага з хавод мусяць укласці 187 з невялікім мільёнаў рублёў.