Яшчэ нават не сярэдзіна студзеня, а рэкі пачалі выходзіць з берагоў, што звычайна ў нашым рэгіёне адбываецца вясной. Але ж занадта цёплае надвор’е запусціла паводку і пытанне ці спынецца яна яшчэ за зіму ці ўжо застанецца да самай вясны.
Так, МНС паведамляе пра выхад з берагоз і затапленне дамоў ды гаспадарчых пабудоў у Магілёўскай ды Гомельскай вобласці. Тут з берагоў павыходзілі маленькія рачулкі басейна Дняпра. Не абыйшлося без праблемаў і ў нашым рэгіёне. У Сененскім ране з берагоў выйшла Лучоса, якая адносіцца да басейну Дзвіны. Каля вёскі Александрыя яна затапіла 80 метраў дарогі. Затапіла настолькі, што ратавальнікам давялося наладжваць тут пераправу людзей чоўнамі. Бо вада цалкам адрэзала вёску ад цывілізацыі.
Нагадаем, што гэта ўжо не першы выпадак. 2 студзеня ў Лёзненскім раёне з берагоў выйшла Ардышоўка — таксама Дзвінскага басейну. Рэчка затапіла мост і каля 10 метраў дарогі ў бок вёскі Кучыншчына.
