Прозвішча падсуднага нам пакуль не вядома - яго суд так і не з'явіўся ў агульнай базе, што не рэдка бывае з палітычнымі працэсамі. Вядома, што прысуд быў агучаны 25 студзеня. Паводле рашэння суда, малады хлопец, які працуе лабарантам пасля 11 гадзін вечара ішоў з дома ў бар і па дарозе на мясцовай канторы райспажыўкааперацыі пабачыў чырвона-зялёны сцяг. Ён падскочыў, каб сарваць сцяг, але з першага разу гэта не ўдалося - сцяг вісеў дастаткова высока. Таму давялося падскокваць яшчэ раз. Другі раз быў занадта паспяховым і акрамя самога палотнішча ўніз паляцелі і часткі канструкцыі да якой сцяг быў прымацаваны.
На судзе гучала, што хлопец быў на падпітку, але 1 літар піва пра які там гаварылі наўрад ці мог паўплываць на стаўленне да дзяржаўнага сцягу. У выніку хлопец аддзелаўся дастаткова лёгкім па сёняшніх часах пакараннем - 1,5 гады хатняй хіміі за абразу дзяржаўнага сімвала і кампенсацыя дробных стратаў для ўладальніка сцяга.
