На мінулым тыдні Аршанскі суд выпісаў 15 сутак жыхару Барані за выгукнуты лозунг "Жыве Беларусь". У гэтым не было б нічога цікавага, калі б не фармулёўка суда.
Мужчына ў нядзелю 6 жніўня адпачываў у адкрытай кавярні на плошчы каля Езуіцкага калегіюма. І калі збіраўся сыходзіць выгукнуў патрыятычны лозунг. У 11 раніцы наступнага дня яго затрымалі, а яшчэ праз дзень прыезлі на суд. Па сёняшніх часах атрымаць пакаранне за патрыятычныя лозунгі ў Беларусі не нешта надзвычайнае. І, традыцыйна, суд вырашыў, што мужчына такім чынам пратэставаў супраць улады (што ж рабіць, калі патрыятычныя лозунгі з сёняшняй уладай аніяк не сыходзяцца). Сам жа мужчына не пагадзіўся і заявіў, што выгукнуў лозунг не ў знак пратэсту, а таму што любіць Беларусь, а іншых лозунгаў няма. Але Аршанскі суд разбіраецца ў любові!
Тое, што мужчына любіць Беларусь суд прызнаў "недостоверными, поскольку данные обстоятельства не соответствуют действительности". Якімі хімічнымі аналізамі суд вызначыў, што любоў мужчыны "недостоверная" ў пастанове суда не ўказана. За "недостоверную" любоў і лозунг суд пакараў бараньца 15 суткамі арышту.
