Гістарычны герб краіны на пашпарце — здавалася б, што кепскага можа быць у гэтым? Але не для Беларусі. Працягваецца пераслед грамадзян за нацыянальныя сімвалы.
Зваршчыку з Сянна Вячаславу Яхнавецкаму далі вялікі штраф за вокладку пашпарту з «Пагоняй». Пра гэта гаворыцца ў пастанове суда, якая была апублікавана ў банку судовых рашэнняў. Увагу на дакумент звярнуў тэлеграм-канал «Віцебск, я гуляю».
Як пазначана ў пратаколе, Вячаслаў Яхнавецкі «ажыццявіў пікетаванне без адпаведнага дазволу мясцовых выканаўчых органаў» проста ў будынку райаддзелу міліцыі. Так кваліфікаваў участковы наяўнасць у мужчыны вокладкі пашпарта з «Пагоняй», якую ён «дэманстраваў нявызначанаму колу асоб» у РАУС.
За гэта новая старшыня мясцовага суда Натальля Барысавец аштрафавала мужчыну на 2220 руб.
Вячаслаў Яхнавецкі сваёй віны не прызнаў.
