Паборы з работнікаў розных прадпрыемстваў у Беларусі сталі звычайнай справай. Звычайна афармаляюцца такія паборы як добраахвотныя ахвяраванні, але ва ўмовах кантрактнай сістэмы адмовіцца ад "добраахвотнага ахвяравання" работнік практычна не можа. Пад ахвяраванні маскіруецца і збор сродкаў для "Фонда Міра". Работнікам аднаго з прадпрыемстваў Беларускай чыгункі ў Оршы на днях раздалі раздрукаваныя заявы куды трэба толькі ўнесці імя, прозвішча і паставіць подпіс. Заява гаворыць пра тое, што работнік просіць бугалтэрыю перавесці з яго заробку 45 капеек у той самы "Фонд Міра" - распавялі нашаму сайту на ўмовах ананімнасці работнікі гэтага прадпрыемства.

Што ж такое "Фонд Міра - гэта арганізацыя была створана ў СССР для гуманітарнай дапамогі тым краінам у якіх камуністы і саюзнікі Саюзу вялі войны: Ангола, В'етнам, Нікарагуа і г.д. Праўда, пад канец існавання СССР, калі у камуністаў стала меньш магчымасцяў умешвацца ў замежныя канфлікты "Фонд" пераарыентаваўся на гуманітарную дапамогу ўнутры СССР.

Прымусовыя зборы для арганізацыі былі звычайнай практыкай і ў часы Савецкага Саюза. Напрыклад, праваслаўная царква была абавязана пералічваць значную частку сваіх даходаў у гэты фонд. Дзякуючы гэтаму ў некаторыя гады даход фонда даходзіў да 7 мільярдаў даляраў.

Чым сёння займаецца арганізацыя сказаць складана - СМІ рэдка асвятляюць іх мерапрыемствы, акрамя выпадкаў калі да нейкіх святаў чыноўнікі ад імя Фонду ўручаюць ветэранам нейкія падарункі. Часцей узгадваюць пра "Фонд" пад час выбараў, калі ад імя фонду ў выбарчыя камісіі вылучаюць чыноўнікаў і такім чынам квота грамадскіх арганізацый і палітычных партый у камісіях займаецца людзьмі якія ў камісіях выконваюць загады ўладаў.