Рыгор Ягоравіч Трутко нарадзіўся 18 Сакавіка 1912 ў Дуброўне. Пасля заканчэння 4 класаў працаваў пастухом, пасля - паштальёнам. З 1937 вучыўся ў Віцебскім педагагічным інстытуце на гістарычным факультэце і адначасова працаваў на ваенным радыёвузлы. Інстытут скончыў у напярэдадні вайны. Падчас акупацыі стаў партызанам атрада "Кастрычнік" 2-й Заслонаўскай брыгады.

З 1944 па 1954 Рыгор Ягоравіч працаваў настаўнікам, дырэктарам Аршанскай СШ № 5. Затым перайшоў у новую сярэднюю школу № 8 і адпрацаваў у ёй да выхаду на пенсію. У гэтай школе ім быў створаны краязнаўчы музей, дзе экспанаваліся нават косткі маманта.

Настаўнік-краязнаўца шмат падарожнічаў з хлопцамі, вучыў іх любіць свой родны край, не праходзіў міма цікавых людзей і цікавых рэчаў. Як гаворыцца ў біяграфічным даведніку "Аршанскія краязнаўцы" (аўтар З Іванова.), Калі фармаваліся фонды Аршанскага музея гісторыі і культуры, Рыгор Ягоравіч адным з першых перадаў свае архіўныя матэрыялы, сабраныя ў 1950 - 1970 гадах. Сярод іх знаходкі з раскопаў Аршанскага гарадзішча, якія перадаў Трутко археолаг Ю.А.Драгун, цікавыя прадметы, сабраныя ў паходах па родным краі, а таксама багатыя калекцыі нумізматыкі.

Найстарэйшы краязнаўца і на заслужаным адпачынку быў актыўным. Ён шмат чытаў, асабліва гістарычных раманаў, цікавіўся палітычным жыццём краіны. А яшчэ Рыгор Ягоравіч любіў ездзіць на веласіпедзе, умеў плесці кошыкі, у ідэальным стане утрымліваў дом, агарод і невялікую гаспадарку. Выхаваў семярых дзяцей.

Рыгор Ягоравіч Трутко пайшоў з жыцця ў верасні 2001 года.