На левым беразе Аршыцы па вуліцы Камсамольскай, 2 захаваўся жылы будынак манастыра бернардзінцаў. Манахі гэтага каталіцкага ордэна з'явіліся ў Оршы ў 1630 г. пры карале Ўладзіславе 4. Каменны касцёл і двухпавярховы жылы будынак манастыра былі пабудаваныя ў 1636 г. на сродкі холмскага старасты Андрэя Млоцкага і яго жонкі Хрысціны з роду Масальскіх.

Пасля паўстання 1831 г. касцёл быў перададзены вайсковаму ведамству. Не захаваўся не толькі сам касцёл, але і яго выявы. Жылы манастырскі будынак з цягам часу прызначылі пад лячэбніцу. У ім і ў наш час знаходзіцца адно з аддзяленняў гарадской бальніцы імя Сямашкі.