Рассельгаснагляд апублікаваў спіс з 37 беларускіх прадпрыемстваў, якія трапляюць пад абмежаванні на пастаўкі. У іх ліку і УП «Аршанскі малочны камбінат». Яму разам з ААТ «Пастаўскі малочны завод» і ААТ «Малако» з Віцебска забаронена пастаўляць у Расею малочную прадукцыю налівам і сухое малако. ААТ «Верхнядзвінскі масласырзавод» і філіял "Лепельскі МКК" ААТ "Віцебскі мясакамбінат" не могуць пастаўляць толькі малочную прадукцыю налівам. Пры гэтым у Расеі нібыта не ведаюць, што на Аршанскім малочным камбінаце вядзецца маштабная рэканструкцыя.
Абмежаванні на ўвоз у Расею малочнай прадукцыі з Беларусі пачынаюць дзейнічаць з 8 траўня згодна з указаннем Федэральнай службы па ветэрынарным і фітасанітарным наглядзе.
Прычым, што цікава, у гэтым указанні расейцаў не паведамляецца, з якой прычыны ўводзяцца абмежаванні на ўвоз у Расею малочнай прадукцыі з Беларусі. А вось у паведамленні ТАСС гаворыцца, што забарону ўвялі «з-за адсутнасці эквівалентных падыходаў да правядзення ацэнкі адпаведнасці паднагляднай прадукцыі патрабаванням ЕАЭС з боку дзяржаўнай ветэрынарнай службы Беларусі і для спынення абароту на тэрыторыі Расеі няякаснай і небяспечнай беларускай паднагляднай прадукцыі».
