Палітвязень Аляксей Коршун, вывезены з Расеі, знаходзіцца ў Баранавічах. Яму патрэбна дапамога, піша «Вясна».
Па інфармацыі праваабаронцаў, Аляксея Коршуна пасля экстрадыцыі з Расеі перавялі ў СІЗА-6 прыкладна на месяц. У лісце маці ён паведаміў, што ў камеры сядзіць сам. У яго няма ані канвертаў, ані паперы для лістоў, ані кіпяцільніка, нават туалетнай паперы.
«У цэлым усё нармальна. Здароўе таксама нармальна. Можа будзе прасцей пакласці грошы на краму, а я тут куплю ўсё, а то сяджу адзін, нават кіпяцільніка няма».
Аляксей быў асуджаны на 2,5 года калоніі. Пазней яму праз амністыю замянілі калонію на «хімію». Аднак у лістападзе 2021 году ўцёк адтуль. У Варонежы яго затрымала паліцыя 21 чэрвеня. Мужчыну вывезлі ў Беларусь 26 кастрычніка.
Падтрымайце Аляксея грашовымі пераводамі, пасылкамі і тэлеграмамі. Разам з лістом можна дасылаць канверты і паперу для адказу: СІЗА-6, 225413, г. Баранавічы, вул. Брэсцкая, 258 В, Аляксей Сяргеевіч Коршун.
