На правым беразе ракі Аршыцы можна пабачыць двухпавярховы напаўразбураны будынак без даху. Гэта жылы будынак - усе, што засталося ад архітэктурнага комплекса базылянскага манастыра. Базыляне - манаскі ордэн уніяцкай царквы. Уніяцтва ўзнікла на Беларусі пасля Брэсцкай уніі 1596 года, якая абвяшчала аб'яднанне праваслаўнай і каталіцкай царквы пад патранатам каталіцызму. Пабудаваны манастыр быў па жаданні і на ахвяраванні аршанскага старасты Івана Ленькоўскага ў 1758-1774 гадах. Сам Ленькоўскі ўвайшоў у ордэн базылянаў, прыняўшы імя Іосіф і сваёй набажнасцю дасягнуў звання архіепіскапа Смаленскага. Памёр ён у Оршы ў 1771 годзе і быў пахаваны ў гэтым храме.