Каля абеду 11 студзеня ў раёне Чаромушак засталося без вады 13 шматпавярховікаў і 40 прыватных дамоў — паведаміла МНС. Прычына ў тым, што на вуліцы Матросава разарвала трубу водазабеспячэння. Ратавальнікі ў сваёй зводцы паведамляюць, што ваду ў кватэры вярнулі а 21-55. Мясцовыя жыхары нам гавораць, што вада да ўсіх дайшла бліжэй да 11 гадзін вечара і што такі выпадак у гэтым раёне ўжо не першы за сезон. Перад Новым годам у Чаромушках таксама былі праблемы з вадой.

А ў суседнім Горацкім раёне адбылася сапраўдная катастрофа, якая ледзь не скончылася трагедыяй. Здарэнне адбылося раніцай таго ж дня — 11 студзеня. У кацельнай малочна-таварнай фермы, якая стаіць асобна ад самой фермы выбухнуў кацёл на цвёрдым паліве. Выбух быў такі моцны, што хваляй быў знішчаны не толькі сам кацёл, але і часткова разбурыла сцены кацельнай, пліты перакрыцця ды рэзэрвовы кацёл. Пры такім выбуху без чалавечых ахвяраў магло абыйсціся толькі цудам. Цуда не адбылося — мясцовы 20-гадовы качагар шпіталізаваны з траўмамі рознай ступені цяжкасці. Папярэдняя версія прычыны пажару — у батарэях не было цыркуляцыі цепланосьбіта, гаворачы проста ці то вады ў ацяпляльнай сістэме не было, ці яна застрала і перастала цыркуляваць. Пасля такога выбуху хутка ацяпленне не адновіцца. І зараз — як мінімум да 15-га чысла — ферма будзе ацяпляцца цеплавымі пушкамі.

Дарэчы ў тым жа Горацкім раёне ў ноч з 11 на 12-е адбылося яшчэ адно здарэнне, якое ледзь не скончылася трагічна. У вёсцы Рэкта загарэўся прыватны дом. Дзякуючы спрацоўванню супрацьпажарнай сігналізацыі, ўдалося выратаваць гаспадара хаты і яго 10-гадовага сына.