У канцы сакавіка супрацоўнікі міліцыі падчас прафілактычнай праверкі знайшлі 40 літраў пафарбаванага паліва ў двары ў работніка СПУ»Перамонт". На мужчыну былі складзены два адміністрацыйныя пратаколы: за крадзеж дзяржаўнага паліва і за яго незаконнае захоўванне. Маёмасць была вернута гаспадарцы, а правапарушальнік заплаціў штраф у памеры 500 рублёў.
Як высветлілася пазней, гэта быў не адзіны падобны выпадак у раёне. Такое ж правапарушэнне было выяўлена ў той самы дзень у аграгарадку Зубкі.
Як вядома, паліва, якое размяркоўваецца па сельгаспрадпрыемствах у перыяд пасяўной і ўборачнай, фарбуюць спецыяльна. Робіцца гэта, каб пазбегнуць крадзяжоў і наступнага перапродажу. Але жадаючых падзарабіць такім чынам такія захады не спыняюць.
Дарэчы, адміністрацыйная адказнасць прадугледжана не толькі ў дачыненні да тых, хто скраў дзяржаўнае паліва для продажу: пакаранне чакае і таго, хто купляе крадзенае. Так, 60 літраў афарбаванага паліва супрацоўнікі міліцыі знайшлі у 52-гадовай жыхаркі Лёзненшчыны, якая патлумачыла, што купіла яго з рук у знаёмага. Жанчыне пагражае штраф памерам ад 420 да 2100 рублёў.
