Руіны сядзібы Цюндзявіцкіх

Яшчэ ў пачатку лютага Orsha.eu пісаў, што гэты гістарычны аб’ект выстаўлялі на аўкцыён. Але пакупніка так і не знайшлося.

Сядзіба знаходзіцца ў вёсцы Галошава. Захаваліся дзве гаспадарчыя пабудовы, тэраса. Цагляны будынак 1897 года пабудовы.

Гэта гісторыка-архітэктурная каштоўнасць 3-й катэгорыі (рэгіянальнага значэння). Дзяржава павінна клапаціцца пра яе захаванасць. Але на знешнім выглядзе сядзібы гэта ніяк не адбілася...

Цюндзявіцкія пакінулі гэтыя мясціны ў 1917 годзе. У савецкі час тут размяшчалася спецшкола, а потым звычайная сельская школа. Пазней для будынка не знайшлося прымянення, і ён пачаў паступова прыходзіць у заняпад.

Чарговы аўкцыён адбудзецца 30 красавіка. Стартовая цана — 42 рублі.

Вадзяны млын

XIX стагоддзе, Талачынскі раён, каля аграгарадка Друцк.

Руіны адносяцца да вёскі Каменнае-Крывое. Будынак млына мураваны, з чырвонай цэглы, трохпавярховы. Некаторыя гісторыкі мяркуюць, што будаўніцтва млына звязана з родам Гардзялкоўскіх, у якіх была сядзіба ў Друцку.

Млын выглядае ўражліва, але ён закінуты, хоць яшчэ пасля вайны выкарыстоўваўся. Размешчаны ў маляўнічым месцы, на рацэ.

Млын не выстаўлены на аўкцыён, але пазначаны на карце невыкарыстоўваемых аб’ектаў нерухомасці Камітэта дзяржмаёмасці. Падрабязней пра гэты аб’ект можна даведацца ў ААТ «Друцк-Агра».