Orsha.eu зазірнуў на анлайн-карту Камітэта дзяржмаёмасці, дзе пазначана нявыкарыстаная нерухомасць, якую прадаюць з аўкцыёнаў. Там ёсць цэлы раздзел, прысвечаны аб’ектам гістарычнай архітэктуры. Тры з іх знаходзяцца ў Сенненскім раёне.

Станцыйны дом канца XIX стагоддзя

Калі казаць сучаснай мовай, гэта старая паштовая станцыя. Знаходзіцца ў вёсцы Паграбёнка. Будынак быў узведзены ў стылі неаготыкі на шляху з Санкт-Пецярбурга ў Кіеў. У савецкі час тут пасялілі людзей, але ўсё скончылася пажарам.

Да станцыйнага дома прыбудаваны яшчэ адзін будынак, ёсць два хлявы, плот. Таксама ёсць будынак флігеля для ямшчыкоў з прыбудовай.

Усё гэта выстаўлена на аўкцыён, які пройдзе 30 красавіка. Стартавы кошт аб’екта – 210 руб.

Бровар

Знаходзіцца ў аграгарадку Полымя. У сценах гэтага будынка да 2002 года працаваў спіртзавод.

Склад з дзвюма прыбудовамі, падвалам, асфальтавым пакрыццём – трохпавярховы цагляны будынак, пабудаваны ў 1913 годзе. Галоўны корпус спіртзавода з 11 прыбудовамі, падвалам, комінам, асфальтавым пакрыццём – двухпавярховы цагляны будынак 1890 года пабудовы. Цагляны будынак малочнай 1913 года пабудовы. Зернясклад з асфальтавым пакрыццём 1913 года. Спіртасховішча з прыбудовай.

Аўкцыён пройдзе 30 красавіка. Пачатковы кошт – 210 руб.

Сядзіба Свяцкіх «Беліца»

Знаходзіцца ў аграгарадку Полымя. Пабудавана ў стылі позняга класіцызму ў пачатку XIX стагоддзя. Была перабудавана ў другой палове XIX – пачатку XX стагоддзя.

Раней належала роду Свяцкіх, якім давялося з’ехаць у Польшчу пасля рэвалюцыі. У 1903–1904 гадах тут працаваў паэт Янка Купала.

У пачатку 1990-х будынак быў закінуты і хутка згарэў у выніку падпалу. Захаваліся толькі частка вонкавай сцяны галоўнага фасада і васьмігранная двух’ярусная вежа.

Сядзіба не выстаўлена на аўкцыён, але пазначана на карце нявыкарыстаных аб’ектаў нерухомасці Камітэта дзяржмаёмасці.