Тэлефонныя ашуканцы дзейнічалі па ўжо стандартнай схеме: 57-гадоваму аршанцу патэлефанавалі ад імя аператара мабільнай сувязі. "Аператар" пераканаў мужчыну, што з яго абаненцкага нумара ажыццяўляецца пераадрасацыя выклікаў, у выніку чаго нумар будзе заблакаваны на патрабаванне "фінансавай міліцыі".
Неўзабаве патэлефанавалі і"фінансавыя міліцыянты". Яны заявілі жыхару Оршы, што яго абвінавачваюць у фінансаванні "варожых дзяржаў". А затым прапанавалі "выратаваць" грашовыя сродкі, пакуль іх не пераслалі "ворагам" і не забралі падчас ператрусаў.
Аршанцу сказалі перавесці грошы праз інфакіёск на ўказаны рахунак. Мужчына выканаў указанні, аднак нешта ў рэкамендацыях "фінансавай міліцыі" яго збянтэжыла, і ён вырашыў звярнуцца ў сапраўдную міліцыю. Гэта дазволіла выратаваць частку грошай: супрацоўнікі банка заблакавалі яго рахункі, перш чым адтуль сышлі сродкі.
Пра гэты канкрэтны выпадак з жыхаром Оршы распавёў тэлеграм-канал "Міліцыя Віцебшчыны". На нашым сайце мы таксама згадвалі падобныя гісторыі - як ашуканцы пераканалі 83-гадовую аршанку, што з яе рахунку "фінансуецца СВО", і як жыхарка Шклова ледзь не страціла кватэру "з дапамогай" той жа "фінансавай міліцыі".
