У двары дома 64-гадовага трактарыста-машыніста супрацоўнікі міліцыі знайшлі 60 літраў фарбаванага дызельнага паліва. Агульнавядома, што паліва для сельгаспрадпрыемстваў такім чынам "пазначаюць", каб не было сумневаў, набытае яно законным чынам або скрадзенае.

Аднак гэтая акалічнасць не бянтэжыла работніка сельгаспрадпрыемства: было ўстаноўлена, што мужчына сістэматычна зліваў гаручае з грузавой аўтамашыны, каб выкарыстоўваць яго ў асабістых мэтах. 60 літраў паліва было канфіскавана, а яго "здабытчык" прыцягнуты да адміністрацыйнай адказнасці за дробны крадзеж.

З надыходам пасяўной кампаніі супрацоўнікі Аршанскага РАУС абвясцілі вайну спробам скрасці дзяржаўнае паліва, якое выдаецца для работ на сельскагаспадарчай тэхніцы. Міліцыянты не толькі самі праводзяць адмысловыя рэйды, але прыцяваюць да гэтай працы простых грамадзян - іх просяць быць пільнымі і паведамляць пра любыя спробы скрасці або перапрадаць паліва, выдаткаванае на патрэбы АПК.

Такія крадзяжы з’яўляюцца сезоннай з’явай і актывізуюцца падчас пасяўной і ўборачнай. Нядаўна ў суседнім Горацкім раёне злавілі работніка аднаго з сельгаспрадпрыемстваў, які зліваў паліва цягам цэлага месяц - ён рабіў гэта штодня перад працоўнай зменай. І паступова "назбіраў" ажно 310 літраў.