Аршанскі райвыканкам праводзіць грамадскае абмеркаванне новага праекта развіцця асаблівай эканамічнай зоны «Брэміна-Орша».
З 2024 па 2030 гады тут пабудуюць новыя дамы, запрацуюць вытворчыя магутнасці некалькіх арганізацый, а колькасць працоўных месцаў павялічыцца да 1 600. З’явіцца шматфункцыянальны гандлёва-выставачны комплекс з выставачнымі заламі, зонай гандлю і паслуг, перамоўнымі і канферэнц-заламі, аб’ектамі грамадскага харчавання, аптэкай і памяшканнямі медыцынскага прызначэння.
У плане абяцаюць, што будуць прытрымлівацца нарматываў азелянення тэрыторый вытворчых аб’ектаў. Кажучы прасцей, вакол будуць не толькі будынкі, але і дрэвы з кустамі.
Паглядзець і азнаёміцца з падрабязным планам можна па гэтай спасылцы.
Выказаць сваё меркаванне да 11 красавіка можна, напрыклад, па электроннай пошце: [email protected].
Лагістычны комплекс «Брэміна-Орша» з’явіўся ў Болбасаве ў 2018 годзе. Яго ўласнікі — бізнесмены з блізкага асяроддзя ўлады: Аляксандр Зайцаў, Мікалай Варабей і Аляксей Алексін. Рэзідэнтам прадастаўлены шырокія падатковыя льготы.
Журналісты-расследавальнікі сцвярджаюць, што маюць факты, якія пацвярджаюць, што праз гэты лагістычны хаб ішла кантрабанда кветак, тканін і прадуктаў з Еўропы ў Расію.
