Агульны суд Еўразвязу адхіліў пазоў Беларускага металургічнага завода. Прадпрыемства, галоўнае ў аб’яднанні, у якое ўваходзіць і аршанскі завод «Лягмаш», падавала пазоў з просьбай аб зняцці санкцый Еўразвязу. Аб’яднанне металургаў уваходзіць у Дзяржаўны вайскова-прамысловы камітэт.
Суд апублікаваў сваё рашэнне на ўласным сайце.
БМЗ трапіў пад санкцыі яшчэ як прадпрыемства, звязанае з рэжымам Лукашэнкі. Пры гэтым улічваліся рэпрэсіі ў Беларусі і падтрымка шырокамаштабнай расійскай агрэсіі супраць Украіны.
У судзе прадстаўнікі БМЗ сцвярджалі, што завод не мае дачынення да дзеянняў беларускіх уладаў, фінансава не падтрымлівае рэжым Лукашэнкі і дзейнічае як камерцыйнае прадпрыемства, арыентаванае на экспарт.
Суд, аднак, вырашыў, што санкцыі ўводзілі абгрунтавана. Там давялі, што БМЗ атрымлівае выгады ад рэжыму Лукашэнкі, структурна залежыць ад дзяржаўнага апарату і робіць унёсак ва ўстойлівасць рэжыму. Прадпрыемства ў Бруселі прызналі інструментам дзяржаўнай эканамічнай палітыкі, які адыгрывае ключавую ролю ў экспартнай мадэлі эканомікі Беларусі. Суд адзначыў, што БМЗ атрымлівае дзяржаўныя льготы і падтрымку, якія дазваляюць яму канкураваць на міжнародным рынку, тым самым умацоўваючы эканамічныя пазіцыі рэжыму Лукашэнкі.
У выніку пазоў БМЗ суд адхіліў у поўным аб’ёме. Гэта ўжо другая безвыніковая спроба БМЗ скасаваць санкцыі Еўразвязу. Разам з БМЗ церпіць праблемы і абмежаванні аршанскі «Лягмаш».
Аргумент пра тое, што завод ніяк не мае дачынення да дзеянняў уладаў Беларусі, лёгка разбіваецца сацыяльнымі сеткамі прадпрыемстваў, што ўваходзяць у прамысловае аб’яднанне. З палову інфармацыі там — здымкі з прапагандысцкіх акцый, падтрымка выбараў, партрэты Лукашэнкі і іншае.
Акрамя таго, нядаўна выйшла расследаванне, якое паказвае, як «Лягмаш» удзельнічае ў дапамозе Расеі ў працягу вайны супраць Украіны. Аршанскае прадпрыемства — частка ланцужка, што дазваляе расейскім акупантам забяспечваць далейшыя абстрэлы мірных гарадоў Украіны, што прыносіць сотні ахвяр штомесяц
Сёлета «Лягмашу» споўніцца 80 гадоў. У сваіх сетках, акрамя транслявання дзяржаўнай прапаганды, прадпрыемства нядаўна запачаткавала карысную і цікавую рубрыку пра гісторыю завода.
