У найбліжэйшы панядзелак, 31 сакавіка, у інтэрнэце пройдзе кірмаш вакансій Талачынскага раёна. Ён прыцягнуў увагу Orsha.eu сваёй мэтавай аўдыторыяй. Запрашаюць грамадзян Беларусі, якія не заняты ў эканоміцы, а таксама замежнікаў, што маюць дазвол на пастаяннае пражыванне ў нашай краіне. Акрамя таго, гэты кірмаш прызначаны для людзей, якія вызваліліся з месцаў пазбаўлення волі.
Пакуль толькі дзве арганізацыі размясцілі на старонцы кірмашу свае вакансіі. "Талачынскі Элеватар-Агра" шукае кіроўцу аўтамабіля, аператара працэсу апрацоўкі збожжа, праграміста і трактарыста. А "Катпрамбуд" (Коханава) запрашае на працу толькі кіроўцу аўтамабіля.
Падчас правядзення кірмашу могуць з’явіцца новыя прапановы.
Дарэчы, у 2024 годзе на працу ў Беларусь прыехалі 33,8 тыс. гастарбайтараў. Гэта ў 2,5 разы больш, чым годам раней. На першым месцы - туркмены: 16,3 тыс. чалавек за год, а гэта ў 8 разоў больш у параўнанні з 2023 годам.
Далей ідуць расіяне (4,1 тыс. чалавек), кітайцы (2,8 тыс.), украінцы (2,5 тыс.) і ўзбекі (2 тыс.).
