На тэрыторыі Беларусі ў суботу, 29 сакавіка, адбудзецца нешараговая прыродная з’ява, непасрэдна звязаная з космасам.
Як паведамілі аўтары падкасту «Праз космас», нас чакае частковае сонечнае зацьменне, якое будзе бачнае ў Паўночнай Амерыцы, частцы Еўропы (у тым ліку і на тэрыторыі Беларусі), Грэнландыі і Атлантычным акіяне.
Прычым зацьменне можна ўбачыць у любой частцы Беларусі, але ў розны час. Да прыкладу, у Віцебску яго ўбачаць, а 14:41, а ў Магілёве на хвіліну раней. У Берасці ж у 14:31 суботы.
А як у Воршы? Астраномы называюць дакладныя лічбы па нашым горадзе. У Воршы частковае зацьменне Сонца пачнецца ў 14:10 і будзе доўжыцца да 15:11. Максімум зацьменне дасягне ў 14:41, калі Месяц закрые 3,89% Сонца.
Аршанскае зацьменне пры гэтым не самае моцнае ў краіне. Яно будзе большым за магілёўскае, дзе закрыецца 3,1% Сонца, але меншым за віцебскае, дзе Сонца апынецца ў ценю на 5%. Самае ж значнае з абласных гарадоў зацьменне напаткае Гародню — ажно 7,1%.
Найлепшае месца для назірання агулам — поўнач Канады і паўвостраў Лабрадор, дзе максімальная фаза зацьмення дасягне цэлых 93.61%.
