Паводле свежых звестак Белстата, колькасць жыхароў Талачынскага, Сенненскага і Лёзненскага раёнаў за год скарацілася на 630 чалавек. Гэта мінус 1%, калі лічыць па ўсіх трох раёнах. Найбольшае змяншэнне – у Талачынскім раёне, дзе стала на 253 чалавекі менш.
Давайце паглядзім глыбей і параўнаем 2025 год з 2020-м. Карціна яшчэ больш змрочная. Па трох раёнах – мінус 6452 чалавекі. А гэта ўжо больш за 10% за пяць гадоў.
Нагадаем, што за 2024 год насельніцтва Віцебскай вобласці зменшылася амаль на 10 тысяч чалавек. А па ўсёй Беларусі – на 47 тысяч. Праўда, гэтыя лічбы Белстата, хутчэй за ўсё, не ўлічваюць вялікую колькасць людзей, якія з’ехалі з нашай краіны.
