У адной аршанскай краме ў продажы не было капусты, а ў гандлёвай зале – бульбы. Пры гэтым на складзе ўсё гэта было. Пра такія вынікі праверкі адсправаздачыліся ў КДК. Але адначасова адзначылі: сітуацыя ў гандлі стабільная, а асартымент ёсць у дастатковым аб'ёме.
Аднак чытачы Orsha.eu, якія ходзяць у крамы і ўсё бачаць на ўласныя вочы, маглі б і паспрачацца. Прыгадаем хаця б сітуацыю з бульбай Талачынскага кансервавага завода, пра якую мы пісалі ў канцы сакавіка.
Але недахопы на Аршаншчыне былі не толькі з прадуктамі. Нядаўняя праверка паказала, што ёсць праблемы і з тым, як чыноўнікі рэагуюць на звароты людзей. Паводле афіцыйнай інфармацыі, правініліся сфера аховы здароўя і лясная гаспадарка Аршанскага раёна. "У шэрагу выпадкаў звароты разглядаюцца павярхоўна, без правядзення якіх-небудзь праверачных мерапрыемстваў", – удакладнілі ў КДК.
На што ўвогуле скардзяцца жыхары Віцебскай вобласці?
- Камунальна-бытавыя пытанні і добраўпарадкаванне – 41,1%.
- Дзейнасць прадпрыемстваў і арганізацый – 18,5%.
- Пытанні грамадзянска-прававых адносін – 9,9%.
- Дзейнасць органаў выканаўчай улады – 5,1%.
- Парушэнні ў працы кіраўнікоў арганізацый – 3,1% ды інш.
