Артыкул пра хуткае ўвядзенне ў аршанскіх школах заняткаў з праслухоўваннем аўдыёкнігі пра Лукашэнку быў непраўдзівым. І хоць культ асобы з яго савецкімі «хвастамі» прысутнічае ў жыцці Воршы штодня, і кнігу сапраўды надрукавалі, але да такога пакуль не дадумаліся. Насамрэч ніхто ніякай аўдыёкнігі не запісвае, хоць не сумняемся ў тым, што спадары Талай і Саладуха з задавальненнем бы прымалі ўдзел у гэткім «праекце».
Таксама ніхто не будзе ладзіць сустрэчы з расейскім гандляром зброяй і шпіёнам Бутам у Воршы. Сустрэча з гэтым паплечнікам Пуціна сапраўды адбылася ў БДУ, але вось у нашым горадзе яго ніхто не чакаў і сустрэчы з ім ладзіць не збіраецца.
А вы ўчора адразу здагадаліся, што адзін з нашых матэрыялаў утрымлівае першакрасавіцкі жарт?
Запэўніваем — Orsha.eu усе свае 17 гадоў існавання піша праўду і толькі праўду. Нашы факты правераныя. Ну, а 1 красавіка пажартаваць — гэта ж мілы чын. Заставайцеся з намі! Наш партал — востраў праўды пасярод мора дзяржаўнай прапаганды.
