Курортны збор складзе 3%. Яго будуць браць ад кошту пуцёўкі, а калі пуцёўкі няма - ад кошту платных паслуг, якія аказваюць санаторна-курортныя або аздараўленчыя арганізацыі з пражываннем. Плаціць павінны фізічныя асобы, то бок людзі, якія адпачываюць у Сенненскім раёне ў прафілакторыях, аздараўленчых цэнтрах, пансіянатах і г.д.

Не павінны плаціць людзі, якіх накіравалі на аздараўленне і санаторна-курортнае лячэнне за кошт бюджэту, а таксама па прычыне няшчаснага выпадку або прафесійнага захворвання. Таксама вызвалены ад аплаты дзеці, накіраваныя ў лагеры па пуцёўках, кошт якіх быў зніжаны за кошт сродкаў рэспубліканскага або мясцовых бюджэтаў.

Дарэчы, на сайце Сенненскага райвыканкама, у адрозненне ад многіх іншых падобных сайтаў, даволі добра запоўнены раздзел пра мясцовы турызм. Там можна даведацца пра экскурсіі, апублікаваны іх падрабязныя праграмы, ёсць інфармацыя пра гістарычныя мясціны, помнікі архітэктуры і прыроды.

У Сянне захавалася будынак земскай управы, манастыр францысканцаў, ёсць помнік прыроды – крыніца "Каплічка". У раёне можна ўбачыць руіны сядзібы беларускіх шляхцічаў Свяцкіх у вёсцы Полымя. Чортаў камень каля вёскі Вароніна – адзін з самых вялікіх валуноў у Беларусі, які пакінуў пасля сябе ледавік. Старажытнае паганскае капішча ва ўрочышчы Бачарова – месца малітваў і ахвярапрынашэнняў усходніх славян. А яшчэ там вельмі прыгожыя азёры.