Згоду на ягонае прызначэнне ўжо даў Лукашэнка, цяпер справа за малым – мясцовыя дэпутаты павінны зацвердзіць гэтую кандыдатуру.

Іван Багель не мае дачынення да Круглянскага раёна. Нарадзіўся ён у вёсцы Чыгірынка Кіраўскага раёна.

У 2013 годзе скончыў у суседніх Горках Беларускую дзяржаўную сельскагаспадарчую акадэмію. Спецыяльнасць - меліярацыя і водная гаспадарка.

Працаваў у Магілёве галоўным інжынерам базы забеспячэння і камплектацыі ААТ «Кіруючая кампанія холдынгу “Аграмашсэрвіс”», а таксама дырэктарам ААТ «Агракамплект».

Потым у яго была пасада з бясконцай колькасцю слоў. Ацаніце: ён узначальваў сектар па наглядзе за тэхнічным станам машын і абсталявання ўпраўлення механізацыі і нагляду за тэхнічным станам машын і абсталявання камітэта па сельскай гаспадарцы і харчаванні Магілёўскага аблвыканкама.

З гэтай пасады Івана Аляксандравіча накіравалі ў Дрыбінскі раён. Там з кастрычніка 2023 года ён быў першым намеснікам старшыні - начальнікам упраўлення па сельскай гаспадарцы і харчаванні. Гэта пасада - другая па значнасці пасля старшыні выканкама.

Цяпер ён узначаліць вертыкаль у Круглым. Да яго на гэтай пасадзе працаваў былы старшыня Гомельскага райвыканкама Сяргей Уладзіміравіч Ермаліцкі, але нядоўга – з сакавіка 2023 года.