У суд накіравана крымінальная справа супраць двух жыхароў Оршы, якіх абвінавачваюць у незаконнай рыбалцы. Яны лавілі рыбу ў забаронены час, забароненымі прыладамі і метадамі. А яшчэ злавілі рыбу, занесеную ў Чырвоную кнігу Беларусі. Шкода навакольнаму асяроддзю перавысіла 32 тысячы рублёў.
Пра гэты выпадак ужо пісаў Orsha.eu, але цяпер сталі вядомыя падрабязнасці.
Як гэта было
Уначы з 2 на 3 студзеня сябры адправіліся на лодцы па рацэ Дняпро на тэрыторыі Дубровенскага і Аршанскага раёнаў. Сеткамі яны вылавілі 28 падустаў звычайных, 19 галаўлёў, 17 жарахоў, 12 ляшчоў, дзве густэры, аднаго шчупака і адну плотку.
Сярод здабычы аказаліся тры вусачы звычайныя – гэта рыба знаходзіцца пад пагрозай знікнення і ўключана ў Чырвоную кнігу.
Якія наступствы
Агульная шкода навакольнаму асяроддзю – больш за 32 тысячы рублёў, а кошт незаконнага ўлову – звыш 700 рублёў. Абвінавачаныя ўжо добраахвотна кампенсавалі гэтыя сумы ў бюджэт.
На час судовага разбору іх пакінулі пад падпіскай аб нявыездзе. Судовы працэс па іх справе адбудзецца ў бліжэйшы час.
