З надыходам пасяўной кампаніі супрацоўнікі міліцыі спрабуюць супроцьстаяць патэнцыйным спробам скрасці дзяржаўнае паліва, якое выдаецца для работ на сельскагаспадарчай тэхніцы. Падобныя крадзяжы здараюцца нават не гледзячы на тое, што паліва адмыслова падфарбоўваюць - каб адразу было відаць, ці здабыта яно належным чынам.
Аддзел міліцыі Аршанскага раёна просіць грамадзян быць пільнымі і паведамляць пра любыя спробы скрасці або перапрадаць паліва, выдаткаванае на патрэбы АПК. Са свайго боку міліцыя арганізуе вечаровыя і начныя рэйды па мехдварах і складах сельскагаспадарчых арганізацый.
Першыя ж рэйды выявілі, што ахова гэтых аб’ектаў наладжана слаба. Вакол іх часта няма нават платоў, тэрыторыя не асвятляецца ліхтарамі, а дзе-нідзе бракуе нават самых простых замкоў. Супрацоўнікі міліцыі спадзяюцца на сумленнасць грамадзян, а таксама на тое, што патэнцыйных злодзеяў спалохае прыцягненне да адказнасці - як да адміністрацыйнай, так і да крымінальнай. У прыватнасці, за продаж, набыццё і захаванне падфарбаванага паліва вінаватым пагражае штраф памерам ад 10 да 50 базавых велічынь ( ад 420 да 2 100 рублёў).
