Дзмітрый Барадаўка, які ўзначальваў Управу ўнутраных спраў Аршанскага райвыканкаму, пайшоў на павышэнне. Змены пацвердзілі ва УУС Віцебскага аблвыканкама, дзе цяпер будзе працаваць Барадаўка. Былога кіраўніка аршанскай міліцыі перавялі ў Віцебск на пасаду першага намесніка абласной УУС Максіма Суботы. Папярэдні намеснік пайшоў на пенсію.
42-гадовы палкоўнік Барадаўка ачоліў міліцыю грамадскай бяспекі. У Воршы ён працаваў нядоўга — з 17 красавіка 2024 году. Ды і прызначэнне Барадаўка атрымаў «пажарнае». Рэч у тым, што тады міліцэйскае кіраўніцтва два месяцы шукала чалавека на вакантную пасаду ў Аршанскім УУС.
У Воршу Барадаўку прызначаў генерал-маёр Андрэй Любімаў, які тады кіраваў УУС Віцебскага аблвыканкаму. Так знайшлі чалавека на пасаду, якая раптоўна вызвалілася пасля смерці Сяргея Барвянкова.
4 лютага 2024 году былы кіраўнік міліцыі Талачына, які затым узначаліў міліцыю ў Воршы, раптоўна памёр на працоўным месцы ў пачатку дня. Менавіта пры Барвянкове ў горадзе праходзілі масавыя рэпрэсіі супраць нязгодных з палітыкай Лукашэнкі.
Такім чынам, Барадаўка, які раней узначальваў міліцыю ў Чашніках, Лепелі і Кастрычніцкім раёне Віцебску, пайшоў на павышэнне ў абласны цэнтр, адпрацаваўшы ў Воршы меней за 13 месяцаў.
На сайце Аршанскага райвыканкаму змены пакуль не зафіксаваныя. Аднак, паводле нашай інфармацыі, палкоўнік Барадаўка ўжо пакінуў свой працоўны кабінет. Замест яго плануецца кандыдат з Віцебску, але прызначэння яшчэ не адбылося.
Так ці іначай, Ворша атрымае ўжо трэцяга начальніка міліцыі за апошнія гады. Калі Барвянкову ўдалося адпрацаваць некалькі гадоў, тады Барадаўка надоўга не затрымаўся, і цяпер чарговыя змены.
