Грамадская дзяячка Зоя Доля, якая піша звароты ў арганізацыі з просьбай вяртаць у справаводства і візуальнае афармленне беларускую мову, падала сваю справаздачу пра вынікі дзейнасці за 2024 год.
Спадарыня Зоя адзначае, што больш чым у дваццаці раённых цэнтрах Беларусі па яе зваротах выканкамы ўсталявалі банеры, білборды ў гонар беларускіх паэтаў, пісьменнікаў. У васьмі з іх яна пабывала адмыслова, «зладзіла сабе экскурсіі па цудоўных, своеасаблівых гарадах Беларусі, у кожным з іх ёсць свая разынка, ды ўвасобіла на фота тыя выбітныя банеры і радкі вершаў, выслоўяў, што славяць нашу мову і Радзіму».
У тым ліку гэта і Сянно. Банер прысвечаны роднаму слову і беларускім знакамітым творцам размясцілі на фасадзе бібліятэкі ў Сянне. З ім Зоя Доля сфатаграфавалася.
Акрамя таго, дзве арганізацыі ў Воршы пасля зваротаў Зоі Долі стварылі беларускую версію сваіх сайтаў. Гэта філіял «Оршавадаканал» УП «Віцебсквадаканал» са старонкай orshavodokanal.by, а таксама УА «Аршанскі дзяржаўны каледж харчавання» з адрасам ogkp.by.
