У Музеі гісторыі і культуры горада Оршы у гэтыя выходныя сканчвае працу выстава "Чатыры галоўныя вынаходніцтвы Кітая" Інстытута Канфуцыя па навуцы і тэхніцы БНТУ (г. Мінск). Самыя вядомыя вынаходніцтвы, здзейсненыя ў Кітаі ў Сярэднія вякі і распаўсюджаныя сёння па ўсім свеце, - гэта тэхналогія вырабу паперы і пораху, тэхніка кнігадрукавання і стварэнне компаса.
Апошні тыдзень ( да 13 красавіка) ў Аршанскай гарадской мастацкай галерэі В. Грамыкі экспануецца 16-я штогадовая міжнародная выстава “Калегіум”. Гэта адзін з самых даўніх выставачных праектаў Аршанскай гарадской мастацкай галерэі. Першы раз экспазіцыю з такой назвай гледачы ўбачылі ў 2009 годзе, і з таго часу ў пачатку вясны «Коллегиум» збірае аматараў мастацтва пазнаёміцца з творчымі працамі сталых майстроў і першымі эксперыментамі на гэтым шляху маладзейшых калегаў.
З 2 красавіка ў гэтай установе распачала працу новая экспазіцыя “Путь славный” - пра рускага адмірала Паўла Нахімава. Але найбольш цікавая акалічнасць - што выстава падрыхтавана з удзелам сучаснага культавага скульптара Уладзіміра Амадэа. Яго работы экспануюцца таксама.
10 красавіка скончыць працу і выстава дыпломных работ выпускнікоў мастацка-графічнага факультэта Віцебскага дзяржаўнага ўніверсітэта імя П. Машэрава пад назвай «От традиций к современности» ў Аршанскім музеі Ул.Караткевіча. Яна праходзіць у рамках святкавання 95-годдзя нашага знакамітага пісьменніка-земляка, які нарадзіўся ў Оршы 26 лістапада 1930 года.
Таксама нагадваем, што аматараў гістарычных цікавостак чакаюць ва ўсіх музейных установах горада - у кожным з іх працуе сталая экспазіцыя. Магчыма, чагосьці вы яшчэ не бачылі.
