Незвычайная экспазіцыя з інтэрактыўнымі элементамі будзе размешчана ў Музеі гісторыі і культуры Оршы.
Чатыры галоўныя вынаходніцтвы, здзейсненыя ў Кітаі ў Сярэднія вякі і распаўсюджаныя сёння па ўсім свеце, - гэта тэхналогія вырабу паперы і пораху, тэхніка кнігадрукавання і стварэнне компаса. Усе яны аказалі значны ўплыў на развіццё сусветнай цывілізацыі: папера паслужыла щдасканаленню пісьменства і дала штуршок для з'яўлення кнігадрукавання, компас стаў галоўнай падмогай для маракоў, якія здзяйсняюць далёкія падарожжы, а порах пачаў прымяняцца падчас ваенных дзеянняў. Між іншым, яго ўпершыню атрымалі кітайскія алхімікі, спрабуючы вынайсці элексір неўміручасці...
Гэтыя і іншыя цікавыя звесткі аб прадметах, якія мы сёння лічым абсалютна звыклымі і знаёмымі, можна будзе даведацца на выставе, падрыхтаванай перш за ўсё для дзяцей і моладзі. Яна будзе працаваць з 7 лютага да 30 сакавіка. Музей гісторыі і культуры Оршы адкрыты для наведвальнікаў штодзень (акрамя панядзелка) з 10.00 да 18.00.
