Крыху болей за тыдзень спатрэбілася Валерыю Мефадзіенку з Сянна, каб са спісу «экстрэмістаў» трапіць яшчэ і ў спіс «тэрарыстаў», ці, як афіцыйна яго называюць улады пры рэжыме Лукашэнкі, асобай, якая «мае дачыненне да тэрарыстычнай дзейнасці». Спіс рэгулярна абнаўляюць і папаўняюць сілавікі краіны, і ён даўно ператварыўся на пералік людзей і ідэй, якія не падабаюцца ўладам. Хоць пад слоўнікавае вызначэнне «тэрарызму» іх дзеянні наўрад ці трапляюць.
Гэтым разам у «спіс тэрарыстаў» дадалі вядомага коміка Славу Камісаранку, Армэна Арзуманяна, Дзмітрыя Асіюка, Барыса Крыцкага, Анастасію Жыльскую. Нас жа найболей цікавіць Валерый Мефадзіенка — гэта герой нашых папярэдніх публікацый.
КДБ уключыў у спіс жыхара Сянна літаральна праз тыдзень пасля таго, як Мефадзіенка трапіў у пералік «экстрэмістаў». Цяпер у «тэрарыстычным спісе» 1234 чалавекі, з іх больш за 500 — беларусы.
Валерыя Мефадзіенку летась судзілі ў справе, якую праваабаронцы прызналі палітычна матываванай. 48-гадоваму мужчыну, які працаваў у сферы тэхнічнага абслугоўвання і рамонту вылічальнай тэхнікі, інкрымінавалі адразу тры артыкулы Крымінальнага кодэксу, за фінансаванне экстрэмісцкай і тэрарыстычнай дзейнасці.
Падставай пераследу з дапамогай названых крымінальных артыкулаў сталі ягоныя ахвяраванні незалежніцкім ініцыятывам. Якую менавіта дапамогу і каму надаваў мужчына — няясна. Суд праходзіў у закрытым фармаце. Мефадзіенка да суду сядзеў у віцебскім СІЗА № 2.
3 студзеня калегія Вярхоўнага суда на чале з Паўлам Каршуновічам разглядала апеляцыйную скаргу Валерыя Мефадзіенкі на ўтрыманне пад вартай. На гэты момант грамадскасці не вядомыя ні рашэнне калегіі, ні далейшае развіццё справы, ні прысуд.
