Згодна з афіцыйнымі статыстычнымі дадзенымі, у 2024 годзе колькасць работнікаў у Беларусі ў параўнанні з 2023 годам зменшылася на 43 тысячы чалавек (на 1,7% ад агульнай колькасці працуючых). Такім чынам, рынак працы працягвае скарачацца. Асабліва цяжкая сітуацыя склалася ў рэгіёнах, дзе знайсці працу нашмат складаней, чым у Мінску ці абласных цэнтрах.
Пацверджаннем гэтаму з'яўляецца сітуацыя з так званымі "тэрыторыямі з напружанай сітуацыяй на рынку працы". Іх вызначаюць па крытэрыях, якія сведчаць аб праблемах працаўладкавання грамадзян. Напрыклад, у гэтых раёнах у 2 разы (з 3-х да 6-ці месяцаў) павялічана працягласць выплаты дапамогі па беспрацоўі.
Па выніках 2024 года "тэрыторыямі з напружанай сітуацыяй на рынку працы" прызнаны Лёзненскі, Талачынскі і Сенненскі раёны. Прычым першыя два трапілі ў гэты пералік упершыню, а вось Сенненскі быў прызнаны "беспрацоўным" яшчэ ў 2023 годзе. І сітуацыя, здаецца, пагаршаецца.
