Навіна пра выпуск сыра ў новай «мінімалістычнай» нарэзцы выклікала шмат каментароў у мясцовых пабліках. ТАА «Сенненскі сырзавод» спецыялізуецца на вытворчасці сыроў мацарэла і сулугуні. Але жыхары райцэнтра не разумеюць, чаму ў крамах няма сенненскіх сыроў — прычым у любой форме, а ёсць толькі «прывазныя».

Між тым ТАА «Сенненскі сырзавод» і напраўду працуе пераважна на экспарт: прыкладна 90% усіх сыроў экспартуюць у Расію, Казахстан, Кыргызстан, Манголію. На долю прадпрыемства прыпадае 53 % экспарта ўсяго рэгіёна.

Вырабніцтвам сыра ў Сянне займаецца прыватная кампанія «Евробелбизнес», зарэгістраваная ў Віцебску. У 2021 годзе яна выкупіла памяшканні былога маслазавода і наладзіла вытворчасць сыроў на італьянскім абсталяванні. Сенненская мацарэла выпускаецца пад маркай Bonvistto. Гэтая назва два гады таму была прадметам гучнага разбіральніцтва. Міністэрства антыманапольнага рэгулявання і гандлю праводзіла праверку, ці не парушаюць заканадаўства ўладальнікі новага брэнда, назваўшы сваю прадукцыю надзвычай падобна да канкурэнтаў — гандлёвай маркі Bonfesto, пад якой выпускаюць сыры на Тураўскім малочным камбінаце. Абодва прадпрыемствы спаборнічаюць за пашырэнне рынкаў збыта, найперш на тэрыторыі Расійскай Федэрацыі.