Ужо звыш дзесяці гадоў «Воршы» не ўдавалася ўтрымаць у камандзе найлепшых гульцоў — пасля кожнага сезону, неістотна, паспяховага ці не, калектыў развальваўся. Адразу некалькі найлепшых гульцоў нязменна пакідалі каманду ў снежні-студзені, і будаўніцтва калектыву пачыналася практычна з чыстага аркушу. Але дзень 4 лютага ўсяляе надзеі ў душы заўзятараў блакітна-чорных.

Афіцыйная старонка каманды ў тэлеграме паведаміла, што «Ворша» падпісала кантракты з Аляксеем Чарнадаравым, Дзмітрыем Тамэлам, Станіславам Іршавым, Арцёмам Антонавым і Мікітам Воўчанкам. Пры гэтым чуткі данядаўна звязвалі Чарнадарава і Тамэлу з іншымі месцамі працы, а самі стартаўцы толькі тыдзень таму выйшлі з адпачынку.

Таксама ў каманду вярнуўся брамнік Арцём Валадзькоў. Мінулы сезон вартавы брамы прапусціў цалкам, бо служыў у войску.

Старонка заўзятараў клубу «Радыё Аршыца» з нагоды працягнення кантрактаў з названымі футбалістамі ўзгадала, што галоўны трэнер стартаўцаў Мікалай Кітаёў яшчэ ўвосень выказваў надзею, што атрымаецца захаваць аснову каманды перад наступным першынством. Выглядае, што акрамя словаў у клубе з’явіліся дзеянні.

Пакінуў каманду нападнік Дзмітрый Ціхаміраў. Як паведамляюць спартовыя СМІ, наступны сезон ён правядзе ў «Баранавічах», якія таксама гуляюць у І лізе першынства Беларусі.