Вершы Андрэя Хадановіча да оперы «Дзікае паляванне караля Стаха» паўсталі ў супрацы паэта з кампазітаркай Вольгай Падгайскай, якая напісала новы музычны твор паводле культавай аповесці Уладзіміра Караткевіча.
Прэм’ера оперы адбылася ў верасні 2023 года ў Лондане на сцэне міжнароднага цэнтра мастацтваў Barbican у пастаноўцы Наталлі Каляды і Мікалая Халезіна, з удзелам беларускім акцёраў «Свабоднага тэатра» і ўкраінскіх оперных спевакоў і спявачак.
Ідэя скласці вершы да оперы ў асобную кніжку, па словах Андрэя Хадановіча, належыць мастачцы з Кракава, якая паказала графіку да тэкстаў заснавальніцы выдавецтва «Gutenberg Publisher» Валянціне Андрэевай. Там выданне і ўбачыла свет.
Прэзентацыі зборніка з поспехам прайшлі ў многіх еўрапейскіх гарадах, у тым ліку ў Вільні і ў Варшаве.
Андрэй Хадановіч мяркуе, што ў выглядзе тэкстаў атрымаўся «пераклад з мовы прозы на мову паэзіі», і паўстала «драматычная паэма», дзе " ёсць скразны сюжэт, ёсць перагукі з Караткевічам, ёсць амаль цытаты з Караткевіча".
Кніга «Дзікае паляваньне караля Стаха: Вершы да опэры» стала адной з трох, намінаваных сёлета на прэмію Наталлі Арсенневай. Гэтай прэміяй штогод адзначаюцца найлепшыя паэтычныя зборнікі на беларускай мове.
