Аршанскі «Вітэн» прабіўся ў паўфінал чэмпіянату Беларусі ў міні-футболе. У чвэрцьфінале спадужнікам чырвона-чорных быў сталічны «Дарожнік». Калі ў першай сустрэчы аршанцы адносна лёгка перамаглі 4:0, пераадолеўшы геройствы брамніка «Дарожніка» Швайбы, дык у другой праблем было паболей.
На 11-й хвіліне гулец менчукоў Арашкоў пасля розыгрышу кутняга боцу адкрыў лік. Аршанцы доўга насядалі на браму гаспадароў спорткомплексу МАПІД, але толькі на 30-й хвіліне здолелі зраўняць лік. Гэта зрабіў Манаенкаў, прычым таксама пасьля розыгрышу кутняга, з таго самага месца, з якога заганяў і «Дарожнік» у першай палове.
Меней за хвіліну прайшло перад другім голам аршанцаў. «Вітэн» выйшаў тры ў аднаго, Зуёнак адпасаваў Лазюку і той моцна ўвагнаў мяч пад бэлю — 2:1 на карысць гасцей! Гульцы «Дарожніка» спрачаліся з суддзём, даводзячы, што ў эпізодзе з адборам мяча аршанцы парушалі правілы, але арбітр парушэння не заўважыў і «выпісаў» жоўтую картку нападніку «Дарожніка» Дунаеву за спрэчкі.
Больш галоў у сустрэчы не было. Дружына Андрэя Чарніенкі перамагае калектыў Валерыя Дасько ў серыі 2-0 і праходзіць у паўфінал.
Спадужнік аршанцаў на наступнай стадыі яшчэ не вядомы. Сачыце за абнаўленнямі на нашым сайце.
